Opis spływu Racibórz-Berlin Drukuj

Odrom we kajaku, ze wsi Racibórz do Berlina.

(tego w Niymcach, bo je tysz pawilon handlowy „Berlin” w Raciborzu na Osrtogu)

 

Chyba kożdy miyszkaniec wsi, odczuwo roz na czos silno poczeba odwiedzynia miasta, bez jakiego cylu, łod tak, ganz einfach i jusz, oglondnyć Rzym i umrzyć. Nojczynściej jedze sie tam PKS-ym, nieroz jeszcze furmankom, a jo żech doł koniom siana i dlo odmiany popłynyłech se do miasta kajakym. Nojbliższym miastem je oddalony o 600 km Berlin.

 


  

I tak po 10 dniach padlowania wylondowoł żech we Berlinie na Kreuzbergu, mojem ulubionym rewirze lumpów i wywrotowców, troch jak „dzielnia” w Raciborzu, kaj mo baza naszo Hałaburda wywrotowych kajakowców. Ale jak żech już do tego Berlina dobieł, to mi sie go jusz oglondać nie chciało. Zatopieł żech kajak we płytkej wodziem, co by go jaki kreuzberski lump nie ukrodł i na flaszka ranigasta nie wymieniył. Kopnyłech sie na pobliski dworzec wschodni, siednyłech sie do zugu byle jakego, nie dbając o bagaż, ale bilet do Raciborza kupiłech. Ja, do wsi Racibórz do sie z Berlina dojechać zugiem od roku 1880. Zrobiełech se przesiadka we Słubicach

i skoczyłech do Szczerbińskiego na dober ciastko i kawa. To je chłop ze akcyntym raciborskim, co tam se cukiernia otworzył. Mo tam tysz szwarne sprzedowaczki

co majom moc bitej śmietany za dekoltym. Trocha ściemniom, ale nie powiem kaj.

To je jo w roli głównej. Inkszych ról nie było, bo to je monodrama. Publika uciekła na poczontku sztuki. Chyba nie zdzierżeli napiyncia dramaturgicznygo. Jak widać lubiam sie nie golić. Nie mógłbych być prezysym banku, to tysz se pływom kajakym kaj chcam i kedy chcam i mom wszyckich w żici.

 

Na takej wyprawie zawsze coś sie traci ale zyskuje. Straciłech te rowerowe rynkawiczki bez palców co je widać na zdjynciu (som dobre do padlowania) i trocha kilogramów. Myślam co zyskołech, ale nic mi do gowy nie przyłazi. Możno yno, że pobieł swój łostatni rekord we wyntkowaniu bezwyntkowym – to je we chytaniu ryb gołymi rynkami. Ale jo nie je napalonym wyntkorzym i niespycjalnie mje take rekordy satysfakcjonujom. No ale jak to sie godo; stało sie ...

 

 

Tym rozem trefieł mi sie gupi amur. Kajak mo 4,15 m długości, to se ta ryba pomierzcie. Łostatni rekord to był gupi sum, prowie tak som wielki, chycony rynkami na Wiśle i wielki, gupi łosoś. Miyndzy rybami, tak jak miyndzy ludziami, tysz przytrofiajom sie okazy psychicznie zdrowo szajbnyte. Policzyłech, że wielko, gupio ryba przytrafio sie statystycznie raz na 500-set przepadlowanych kajakym kilometrów. Wyntkorzu leszczowy, godom ci; jak chcesz chycić ryba swojygo życio, to zamień wyntka na wiosło. Aha ! Ważno informacja dlo obrońców praw zwierzoków; ryba żech wypuścieł. Złomołech dlo wos przepisy, bo to był amur niymiecki, a po niymieckim prawie rybackim, chyconej ryby nie można wypuszczać nazot do wody, yno trza jom zjeść. Ale to tysz była porcja na cołkie wesele, a tyn amur nie spełnioł żodnych życzeń, nie wyczarował mi pieknej princeski ze wielkim posagem. Zjodłech się puszką paprykorza szczecińskiego. Nie był dobry. Mogłech zjeść tego amura.

 

Na tako wyprawa nie trza zabiyrać prowiantu na cały czas, to nie je Amazonia. Idzie tak poplanować spływ, coby roz na dzień zjeść coś na ciepło - widelcym i nożym.

Yno w strefie nadgranicznyj mogom sie przytrefić indiańske wioski – wigwamy,

a przed nimi zaparkowane Mustangi Fordy abo Chevrolety Corvetta.

Ganc zapomniołech pedzieć, że Odrom sie do Berlina dopłynyć nie do. Na 550 km

-etrze, we Eisenhüttenstatd, tsza skryncić ze Odry na kanał Odra-Szprewa, bo inakszy dopłynie sie do Szczecina, abo Świnoujscia, abo i Kopenhagi, a nawet Roterdamu, a i do Nowego Jorku sie do, potym Kanał Panamski, Ocean Spokojny, Ocean Indyjski, Kanał Sueski, Cieśnina Gibraltarsko, zaś Roterdam, Kopenhaga, Świnoujście, Szczecin, Koźle i gupio sie gały wybałuszo, że żeś sie je nazot

w Raciborzu, a nie w Berlinie. Szluk kawy pozwolo nie przespać skryntu na Berlin.

Koźle. Cappuccino do pyłna poproszam. 

Na trasie od Koźla do Wrocławia (Brzeg Dolny) do przepłynycia som 22 śluzy.

Nie lubiam iść na łatwizna, to sie zawziełech, że kajak na śluzach bydam przenosić. Mo być dramatycznie, w końcu robiam sztuka. Po pienciu takich przenoskach doszeł żech do konkluzje, że sie przestwiom z dramatu na komedia. Chyba mi nadmiar świyżygo luftu cołkiem instynkt smozachowawczy uśpieł. To był richtig gupi pomysł.

 

Wrocław. Uważejcie kaj parkujecie kajak.

 

Przenoski to je strata czasu i ambicje. A śluzowanie idzie ganz wartko i je fajnom odmianom, idzie dych chycić, je do kogo gymba otworzyć abo cigareta wysympić. Koszt śluzowania je niewielki, ale przy takej ilości śluz robi sie ze tego fajno sumka. Ale warto zainwestować we śluzowanie. Do godz.16-stej kosztuje 3,64 zł, po 16-stej x 2. Tsza mieć mieszek z kotlokami inakszy grozi przenoska. Śluzowi nie majom wydać reszty. Nic nie pływo, to jeich kasa je pusto. Wszyscy som bardzo mili, ale nie szpekuluj, że cie ześluzujom na fajno gymba, nowet jak połowa śluzowych to som szwarne i wynudzone babki. Łod pewnygo wieku państwowo rynta je ważniejszo nisz uciechy ze nieznajomym.

 

Nic nie płynie? Bieresz opona i spływosz. 

 

Po cołkim dniu padlowania zmynczone muskuły chcom odpocznyć. Ciało i duch najlepszy sie regeneruje we śnie. Jak mosz namiot, to możesz se go postawić kaj chcesz na brzegu, yno nie wlazować w parada wyntkorzom, no i możno nie

w Głogowie. Miasto je od 1945 festungiem, a jego mieszkańcy sie bronią przed obcymi od strony wody. Mają we Głogowie różowy most, ale nie mieszkajom tam różowe świnki z bajki.

 

 

Jak mo to być przygoda przez wielke Py, to nie tsz sie codzień prysznicować abo walić kupa do porcelany. Idzie sie nie myć wcale bez tydzień i woniać wielorybym bez strachu, że cie kto harpunym przebije. Można tysz prać bobra w Odrze. Woda je wszyndzi czyściutko jak we Jordania. Do sie niom dzieci chrzcić.

 

Piyrsze miejsce dlo Portu Uraz.

  

We moje wsi Racibórz, sie sołtysowie wymyśleli, że bydom budować port. Dopiero co z wołów zleźli, a jusz chcom lotać w kosmos. U nos nikt nie pływo, yno Hałaburda, ale snami nie zadzierajom, bo my wywrotowcy som i jak nas kto richtig wnerwi, to możymy narozrobiać na cołko Polska i Unia Europejsko tysz. Papież kajakorzym był

i momy dobry drut do nieba i jak by co, to jako plaga egipsko możymy zaordynować. Ludność u nas przylazła ze stepów Azji Mniejszej i wody sie ganz einfach boi, ale sołtysowie sie PiaR robili, że najpierw bydzie port, a potym kosmodrom i ludność ich we wyborach wybrała. Aż ktoś policzył koszty i sie zesroł. We Raciborzu port je

o kant WC poczebny. Pryndzej już tyn kosmodrom. U nos we wsi tsza przypływu zdrowygo rozsondku, ale tygo tszaby przywieźć pełno barka z Roterdamu, a u nos płytko ci jest, dno tusz, tusz.

 

 

Barka sie buduje.

  

A na razie jedyno tablica kilometrażowo Odry we Raciborzu i cołym powiecie raciborskim leży, zresztom zepsuto przez firma co robieła roboty wstympne pod kosmodrom - karczowanie krzoków, na zlecenie sołtysów. Bojam sie, ża ta barka

z Roterdamu z braku oznakowanio, Racibórz minie i popłynie se dali do pobliskich Czech.

 

Niech to szlag! Trza bydzie Papiyża budzić.

 

Szlak Odry to nie je yno czisto woda, dziko prziroda i wielko polityka. To tysz som zabytki wymarłych cywilizacyji...

 

 

historia ...

 

 

i teraźniejszość ...

 

Niech to szlag! Trza bydzie Papiyża budzić. 

 

Ale Bytom Odrzański to je richtig niespodzianka. Tako dziura, a tako fajno architektura.

 

 

We tym Bytomiu Odrzańskim je tysz nojlepiej wykostkowana ulica w Polsce...

 

 

Sołtysowie ! Trza wom zamiast wozić dupy po wycieczkach do Brukseli, musowo przybywać na ulica Dworcowa we Bytomiu Odrzańskim i oglondnyć se na własne gały jak idzie drogi budować! Mały Bytom Odrzański zawstydzo cołko Polska.

 

 

To je namacalny cud ! Trza kanonizować nowego świentygo; Kostka Bytomskiego !

 

Po tych wszyckich cudach Polski, zaczło mi sie we DDR-ach w gowie kryncić i miłech zwidy, że mje Trabanty wyprzedzajom...

 

 

 

A to sie okozało, że woda we kanale stoi i padlowanie idzie jak pod górka, to i mje siły witalne opuścieły. Nic mie nie wyprzdzało, bo ostatnio sluza przed Berlinym była

kaput i nic po kanale nie pływało, ani ducha. A tu srazu ze porannyj mgły sie dwóch kajakorzy snaprzeciwka pojawio. Zaś zwidy se myślam, ale ni, oni godajom i to po Polsku.

 

 

Okozali sie być fajnymi karlusami ze Słubic, a na dodatek dobrze wyprowiantowanymi w polske piwo, wroby monopolwe i tytoniowe. Godali, że wrocajom z wyprawy przez bajkowy las szprewaldzki, ale jo se myślam, że jedyn jeździ Mustangiem Fordym, a drugi Chevroletym Corvetom.

 

Trocha my paliwa ze Corvetty upuścili, o biznesach pofilozofowali, polskom kiyłbasom i ogórkami szprewaldzkimi zagryzli. Synki by sie do naszyj Hałoburdy wpasowali bez egzaminów. No ale służba w CBŚ nie drużba, musieli dokonczyć wyprawy, a mje jusz do Berlina zostoł yno rzut cepem.

 

 

To była sobota. Na Kreuzbergu lumpy jusz imprezowali na całygo. Yno jeszcze

dopłynyć muszam do Oberbaumbrücke i koniec. Dali płynyć nie wolno, bo Angela

lumpów pod oknym oglondać nie chce, mo ich dość we Reichstagu. Ale jusz żech sie nie pokozoł na Kreuzbergu, bo by mi zug odjechoł do Annabergu.

 

 

We zugu żech se tak zadumoł, że Odra to je richtig fajno rzeka, ale szmakować jom tsz pomału, jak kiszone ogórki. Troch w gymbie poczimać, jynzykiem pomlaskać, małymi konskami szlukować. Delektować sie niom tsza, a nie obrzyrać. Nie tsza padlować jak ciul 600 kilometrów do Berlina, bo styknie popłynąć se do pobliskego Koźla i napić sie piwa z lumpami w barze w starym porcie. W morda dać, abo

w morda dostać - być, abo nie być.

Trocha ściemniom, ale nie powiem kaj.

Ahoj!